Igice ca mbere
Uruganda FOMI rutumbereye mu Maramvya, zone Mutimbuzi muri komine Ntahangwa mu ntara ya Bujumbura. Urwo ruganda rwatanguye gukora mu 2019, ruri hafi y’ikibuga c’indege mpuzamakungu Melchior NDADAYE. FOMI mu majambo yose ni FERTILISANTS ORGANO-MINERAUX INSDUSTRIES. Ni uruganda ruhingura ifumbire y’ikirundi ivanze n’iy’ikizungu. Ako ni akabirya gatuma iyo fumbire ihurumbirwa mu Burundi no mu makungu.
FOMI ihingura ubwoko butatu bw’ifumbire. Hari FOMI Imbura bakoresha mu gutera ku biterwa nka vyose. Ubwoko bugira kabiri ni FOMI Bagara, ikoreshwa mu kubagara ibiterwa vyikira mu kuzimu nk’ibiraya. Hakaba na FOMI Totahaza ikoreshwa mu kubagara ibinyantete n’ibibogaboga bimwe bimwe. Hambavu y’ubwo bwoko 3 bw’ifumbire, uruganda FOMI rurahingura ishwagara y’indimo.
Abahinga mu vyo gufumbira isi bahimiriza abarimyi bafise imirima yiziziwe n’umururazi, kumijagira ishwagara mu murima ukwezi imbere yo gutera. Mu myaka 7 FOMI imaze, yarashoboye guhingura ubwo bwoko 3 bw’ifumbire n’ishwagara y’indimo. Abarimyi barashima ko isi yagarukanye akanovera n’umwimbu uriyongera. Mu gice ca kabiri, tuzobabwira ingene FOMI yafashije mu gutuma isi ndimwa yimbuka kandi igakingirwa.