𝐌𝐄𝐍𝐘𝐀 𝐈𝐕𝐘𝐎 𝐅𝐎𝐌𝐈 𝐘𝐀𝐑𝐀𝐍𝐆𝐔𝐘𝐄 𝐌𝐔 𝐌𝐘𝐀𝐊𝐀 𝟕 𝐈𝐌𝐀𝐙𝐄 𝐈𝐓𝐀𝐍𝐆𝐔𝐘𝐄 𝐈𝐁𝐈𝐊𝐎𝐑𝐖𝐀

Igice ca gatatu

Mu gice ca kabiri, twarababwiye ko mu myaka 7 ishirahamwe FOMI rimaze rihingura ifumbire, yarashoboye kandi kurungika abahinga bayo ku kivi kugira bigishe abarimyi ingene bokubahiriza ingero zashinzwe zo gufumbira imirima hakoreshejwe ifumbire FOMI. Abo bahinga ba FOMI baratanze n’izindi nyigisho zijanye ahanini n’ubuhinga bwo kurima kijambere. Abarimyi barabikenguruka kuko vyabafashije kugwiza umwimbu.

Mu gice ca gatatu ,tubayagira ku bijanye n’ibikorwa ishirahamwe FOMI rimaze kurangura mu bijanye no gukingira ibidukikije. Umuhinga mu vyo gufumbira isi, Kaboneka Salvator avuga ko bimwe mu bintu bituma isi ndimwa igira amagara meza ari ukuyikingira inkukura. Ku misozi ihanamye abahinga bahanura abarimyi guca imikobeko no gutera ibiti bibana n’indimo. Iyo imisozi ihanamye idakingiye neza, naho ufumbira umurima, inkukura iraheza ikamarira ya fumbire n’ibindi vyunyunyu isi ikenera mu myonga no mu nzuzi.

Ivyo biti hambavu y’uko bituma isi ikingirwa inkukura, birayifasha kugumya vya vyunyunyu ibinyabuzima bikenera kugira bihingure isi ndimwa neza.Uwo mugambi ukaba umaze gufasha uturere imiryango itari mike. Hari n’abamaze kuvyaza ivyo biti umusaruro, bituma amikoro yabo yisununura. Mu gice ca kane, tuzobabwira ibijanye n’ingene uruganda FOMI rwahavuye rurenga imbibe z’Uburundi. Hari abatwandikiye batubaza aho uburyo bwo kwubaka mu bindi bihuvu buva. Muzoronka umuco.