Umushikiranganji ajejwe imigenderanire n’ayandi makungu muri Burkina Faso, Karamoko Jean Marie Traoré yaragendeye uruganda FOMI, kuri uyu wa kane igenekerezo rya 13 Myandagaro 2026. Uyo mushikiranganji akaba yari mu rugendo rw’akazi hano mu Burundi nk’intumwa y’Umukuru w’Igihugu ca Burkina Faso, Capitaine Ibrahim Traoré.
Mw’ijambo ry’ikaze, Icegera c’Umuyobozi Mukuru wa FOMI, Ir. Manyange Herménégilde, yagaragaje akanyamuneza ko kwakira uwo mushitsi muri FOMI, aca agirako ashikiriza muri rusangi ibikorwa nyamukuru uruganda FOMI rurangura kuva mu 2019 mu gisata c’uburimyi, ukugwiza umwimbu no gusubiza isi akanovera karikaratakaye kubera umururazi wibonekeza mu gice kinini c’isi ndimwa mu Burundi.
Yasiguriye abashitsi akarusho k’ifumbire y’ikirundi ivanze n’iy’ikizungu.
Afashe ijambo, Umushikiranganji Karamoko Jean Marie Traoré, yamenyesheje ko kuba yagendeye Uburundi akanashika ahari uruganda FOMI biri mu vyo Umukuru w’Igihugu c’Uburundi yumvikanye na mugenziwe arongoye Burkina Faso igihe yaherukayo, aho bashitse ku masezerano ajanye no guteza imbere ibisata bitandukanye harimwo n’igisata c’uburimyi.
Yarashimye ibikorwa vya FOMI n’ihangiro uruganda rufise mu guteza imbere igisata c’uburimyi. Yavuze ko Burkina Faso yitwararitse ibijanye n’ifumbire narirya abenegihugu baho batunzwe n’uburimyi. Yasozereye ashimishwa n’ukuntu yasanze muri Afrika hariho ukubona kumwe ibijanye no gushikira iterambere nkuko n’Umukuru w’Igihugu ca Burkina Faso abibona.
