Uruganda ruhingura ifumbire y’ikirundi ivanze n’iy’ikizungu FOMI rwasubiye kwitera iteka ko rukora rwisunze amategeko mpuzamakungu y’ubuziranenge, ibidukikije, amagara y’abakozi n’umutekano wabo ku kazi. Ivyo bikaba vyemejwe n’umuhinga TEGUZA Raymond, ajejwe gusuzuma ko ibikorwa vyubahirije amategeko mpuzamakungu y’ubuziranenge, ibidukikije, amagara n’umutekano w’abakozi ku kazi, mw’ishirahamwe mpuzamakungu SQS ryo mu gihugu ca Suisse, risanzwe rikurikirana ko amashirahamwe akora yisunze ayo mategeko. Iryo suzuma rikaba ryatanguye kw’igenekerezo rya 15/7/2025 risozerwa kw’igenekerezo rya 16 Mukakaro 2025.
Nk’uko umuhinga TEGUZA Raymond yabimenyesheje, ishirahamwe FOMI rigenda ritera intambwe nziza mu bisata bitandukanye birigize, uhereye aho baheruka kurigendura, haba ku bijanye n’ubuziranenge, kwubahiriza ibidukikije amagara meza n’umutekano vy’abakozi ku kazi. Yaboneyeho kubipfuriza gutera baja imbere kugira bagume bubahisha certificat baronse mu mwaka wa 2024 arizo ISO 9001, ISO 14001 na ISO 45001.